ဘာစီလိုနာအသင်းဟာ အသင်းရဲ့ ပြင်သစ်နောက်ခံကစားသမား ဆင်မြူရယ်အမ်တီတီကို အသုံးပြုပြီး မန်ချက်စတာယူနိုက်တက်အသင်းမှာ ပုံမှန်ပွဲထွက်ကစားခွင့်တွေ ပျောက်ဆုံးလို့နေရတဲ့ နယ်သာလန် ကွင်းလယ်ကစားသမား ဒွန်နီဗန်ဒယ်ဘိခ်ကို ခေါ်ယူသွားဖို့ ကြိုးပမ်းသွားဖွယ် ရှိနေတယ်လို့ စပိန်သတင်းမီဒီယာတွေကနေ ဖော်ပြလာခဲ့ပါတယ်။

Photo Credit : The Sun

အသက်(၂၄)နှစ်အရွှယ်ရှိ နယ်သာလန်လက်ရွေးစင် ကွင်းလယ်ကစားသမား ဗန်ဒယ်ဘိခ်ဟာ ပြီးခဲ့တဲ့ဘောလုံးရာသီကမှ အေဂျက်စ်ကနေ ယူနိုက်တက်အသင်းဆီကို ရောက်ရှိလာခဲ့တာဖြစ်ပေမယ့် အသင်းမှာ ပုံမှန်နေရာရဖို့ ရုန်းကန်နေခဲ့ရသလို ပွဲစဉ်အများစုမှာ ပွဲထွက်ကစားသမားအဖြစ် မပါဝင်ခဲ့ရပဲ အရန်ကစားသမားအဖြစ်နဲ့ အချိန်ကုန်နေရတာကြောင့် သူရဲ့ယူနိုက်တက်ကစားသမားဘဝ အနာဂတ် အနေအထားတွေက မရေမရာ ဖြစ်လာခဲ့ရပါတယ်။ ယူနိုက်တက်အသင်းမှာကလည်း ပေါ့ဘာ ဖာနန်ဒက်စ် ဖရက်ဒ် တွမ်မီနေးတို့လို ကွင်းလယ်ကစားသမားတွေ များပြားနေတာကြောင့် ဗန်ဒယ်ဘိခ်အနေနဲ့ အသင်းမှာ နေရာရဖို့ ခက်ခဲနေရတာဖြစ်ပါတယ်။

Photo Credit : The Sun

ဒီလိုအခြေအနေရှိနေတဲ့ ဗန်ဒယ်ဘိခ်ကို ဥရောပ ကလပ်အသင်းပေါင်းများစွာကနေ စောင့်ကြည့်လျက်ရှိနေပြီး ဒီအသင်းတွေထဲမှာ ဘာစီလိုနာအသင်းလည်း ပါဝင်လာခဲ့ပါတယ်။ ဘာစီလိုနာအသင်းကတော့ လတ်တလောမှာ အဂွဲရိုး ဒီပိုင်း အဲရစ်ဂါဆီယာတို့လို ကစားသမားသစ်တွေ ခေါ်ယူထားခဲ့ပေမယ့် လာလီဂါရဲ့ လစာကန့်သတ်မှုတွေကြောင့် ကစားသမားများစွာကို လက်လွတ်ရဖို့ ရှိနေပြီး ပြင်သစ်အသင်းနဲ့အတူ ၂၀၁၈ ကမ္ဘာ့ဖလားချန်ပီယံ ဖြစ်ထားခဲ့တဲ့ နောက်ခံလူ အမ်တီတီကိုပါ စွန့်လွှတ်ရဖွယ် ရှိနေပါတယ်။ ဒီကစားသမားကို ယူနိုက်တက်အသင်းဘက်ကနေ ပစ်မှတ်ထားခဲ့ဖူးတာဖြစ်လို့ ဘာစီလိုနာအသင်းက သူတို့ အလိုရှိနေတဲ့ ကွင်းလယ်လူ ဗန်ဒယ်ဘိခ်ကို ခေါ်ယူနိုင်ဖို့အတွက် အမ်တီတီကို အသုံးပြုသွားဖွယ် ရှိနေပြီး ကစားသမားအချင်းချင်း တိုက်ရိုက်လဲလှယ်သွားချင်နေတာဖြစ်ပါတယ်။ ဘာစီလိုနာအသင်းကို ကိုင်တွယ်နေတဲ့ နည်းပြရော်နယ်ကိုးမန်းကလည်း နယ်သာလန်လက်ရွေးစင်အသင်းကို ကိုင်တွယ်ခဲ့စဉ်က ဗန်ဒယ်ဘိခ်နဲ့ လက်တွဲခဲ့ဖူးတာဖြစ်လို့ သူရဲ့တပည့်ဟောင်းကို ဘာစီလိုနာဆီ ခေါ်ဆောင်ချင်နေသလို ဘာစီလိုနာမှာလည်း ဗန်ဒယ်ဘိခ်ရဲ့ အေဂျက်စ်အသင်းဖော်ဟောင်း ဖရန့်ကီဒီဂျောင်လည်း ရှိနေတာဖြစ်လို့ ဗန်ဒယ်ဘိခ်အနေနဲ့ ဘာစီလိုနာကို ပြောင်းရွှေ့ဖို့ စဉ်းစားလာနိုင်ပါတယ်။